3ចំនុចដែលសហគ្រិនមិនសូវនិយាយឱ្យដឹង
សង្គមមនុស្សបច្ចុប្បន្ននេះស្រេកឃ្លានចង់បានការផ្ទាប់ចិត្តភ្លាម គឺយើងចង់បានពេលនេះ ក្នុងរបៀបដែលលឿនបំផុត។ សូម្បីតែភាពជាសហគ្រិនក៏ប្រែប្រួលច្រើនខុសពីមុនដែរដែលរហូតដល់អ្នកខ្លះធានាអះអាងរកលុយឱ្យបានច្រើនក្នុងពេលដ៏ខ្លី ឬមានវិធីរកលុយដែលហូរចូលមិនដាច់គ្មានពេលសម្រាកជាដើម។ ការពិតមួយដែលមនុស្សគ្រប់គ្នាត្រូវចាំគឺគ្មានផ្លូវកាត់ ឬរូបមន្តទិព្វណាមួយដែលជួយគណនីធានាគាររបស់អ្នកកើនលុយយ៉ាងច្រើនលើសលប់ក្នុងពេលតែមួយយប់នោះទេ។ សហគ្រិនថ្មោងថ្មី ឬអ្នកចង់ក្លាយខ្លួនជាសហគ្រិនត្រូវចាំទុកថា សហគ្រិនពិតប្រាកដគឺជាមនុស្សដែលដឹងច្បាស់ថាផ្លូវដែលនៅចំពោះមុខគេត្រូវដើរដោយលំបាក ហើយជោគជ័យភ្លាមៗគឺជាករណីកម្រមានណាស់។ ដូច្នេះអ្នកត្រូវ៖
១/ ដឹងច្បាស់ថាបរាជ័យអាចនឹងកើតមាន
សហគ្រិនជាមនុស្សដែលក្លាហាន ជាមនុស្សដែលដឹងថាគ្មានការធានាណាមួយដែលមិនឱ្យគេដើរដួលនោះទេ។ បើគ្មានការប្រថុយទេ ក៏គ្រាន់លទ្ធផលធំដុំដែរ ហើយអ្នកត្រូវតែជាមនុស្សដែលហានទទួលស្គាល់បរាជ័យ។ អ្នកមិនចង់ឱ្យវាកើតឡើងទេ ប៉ុន្តែអ្នកត្រូវយល់ឱ្យច្បាស់ថា វាអាចនឹងកើតឡើងបាន ហើយអ្នកត្រូវតែប្តេជ្ញាចិត្តរៀនសូត្រពីបរាជ័យបើអ្នកបានជួបវា។
២/ ស្ម័គ្រចិត្តធ្វើកិច្ចការដែលលំបាក
សូមទៅសួរសហគ្រិនជោគជ័យភាគច្រើនមើល តើការងារប្រចាំថ្ងៃរបស់គេមានស្ថានភាពដូចម្តេចខ្លះនៅពេលគេចាប់ផ្តើមដំណើរដំបូងៗ? គេប្រហែលជាឆ្លើយថាគេក្រោកទៅធ្វើការមុនពេលថ្ងៃរះ ហើយត្រឡប់ពីធ្វើការវិញក្រោយពេលថ្ងៃលិច។ ដូច្នេះ អ្នកត្រូវតែស្ម័គ្រចិត្តធ្វើការ។ មនុស្សទាំងអស់មានពេលដូចគ្នា ប៉ុន្តែមិនមែនមនុស្សគ្រប់គ្នាប្តេជ្ញាចិត្តធ្វើការឱ្យអស់ពីកម្លាំងកាយចិត្តដើម្បីបង្កើតមុខជំនួញផ្ទាល់ខ្លួនទេ។
៣/ ស្ម័គ្រចិត្តរៀនជាប្រចាំ
សហគ្រិនជោគជ័យគឺជាមនុស្សដែលរៀនមិនចេះចប់ គឺគេតែងតែស្វែងរកឱកាសដើម្បីស្រូបយកពត៌មាន និងចំណេះដឹង។ បើទោះបីមានពេលតិចតួច ឬមិនមានពេលទំនេរសោះ ក៏សហគ្រិនជោគជ័យព្យាយាមបង្កើតពេលវេលាអានសៀវភៅ បង្កើតបណ្តាញជាមួយមនុស្សដែលមានចិត្តដូចគ្នា និងបង្កើតទំនាក់ទំនងជាមួយមនុស្សដែលមានបទពិសោធន៍ច្រើនដែរ។ ការធ្វើជាសហគ្រិនមិនមែនជារឿងងាយស្រួល ប៉ុន្តែរឿងអស្ចារ្យអាចកើតឡើងនៅពេលអ្នកយល់ថា ជោគជ័យភ្លាមជាករណីកម្រ ហើយអ្នកត្រៀមខ្លួនជាស្រេចដើម្បីធ្វើការគ្រប់បែបយ៉ាង៕
កែសម្រួលដោយៈMr365
